கௌதம் மேனன் இயக்கத்தில் நடிகர் விஷால்!

நடிகர் விஷால் அடுத்ததாக கௌதம் மேனன் இயக்கத்தில் நடிக்கவுள்ளதாக தகவல்கள் தெரிவிக்கின்றன. தமிழ் திரைப்பட தயாரிப்பாளர் சங்கத் தலைவரும், நடிகருமான விஷால் தயாரிப்பாளர் சங்க நலனுக்காக இப்படத்தில் நடிக்கவுள்ளதாகவும் தகவல்கள் தெரிவிக்கின்றன. விஷால் அயோக்யா படத்திற்கு பின் திரு இயக்கத்தில் ஒரு படம் நடிக்கவுள்ளார். அதற்கு பின் கௌதம் மேனன் படத்தில் நடிக்கிறார். இயக்குனர் கௌதம் மேனன் இதுவரை கமல், அஜித், சிம்பு என பல முன்னணி ஹீரோக்களை வைத்து ஹிட் படங்களை கொடுத்துள்ளார். தற்போது தனுஷை வைத்து 'என்னை நோக்கி பாயும் தோட்டா', விக்ரமை வைத்து ‘துருவ நட்சத்திரம்’ போன்ற படங்களை இயக்கி வருகிறார். இந்த இரண்டு படங்களும் தாமதமாகி வருகிறது. இந்நிலையில் விஷாலை வைத்து அடுத்த படத்தை எடுக்க முடிவு செய்துள்ளார். விஷால் ஆக்‌ஷன் ஹீரோ, கௌதம் மேனன் லவ் மற்றும் போலீஸ் கதை எடுப்பதில் கில்லாடி. அதனால் இப்படம் ஆக்‌ஷன் ரொமாண்டிக் போலீஸ் படமாக இருக்கலாம் என நம்பத்தகுந்த வட்டாரங்கள் தெரிவிக்கின்றன.