இளையராஜா 75: டிக்கெட் விற்பனைக்காக வானில் பறக்கவிருக்கும் இளையராஜா, விஷால்!

தமிழ் திரைப்பட தயாரிப்பாளர் சங்கத்தின் சார்பில் இசையமைப்பாளர் இளையராஜாவின் இசைப்பணியை பாராட்டி,அவரை கவுரவிக்கும் விதத்தில் இளையராஜா75 என்கிற நிகழ்ச்சி நடக்கவுள்ளது. இந்நிகழ்ச்சி மூலம் திரட்டப்படும் நிதியை, தயாரிப்பாளர் சங்கத்தின் வளர்ச்சிக்கு பயன்படுத்த திட்டமிடப்பட்டுள்ளது. வருகிற  பிப்ரவரி மாதம் 2 மற்றும் 3 ஆகிய தேதிகளில் சென்னை ஒய்.எம்.சி.ஏ. மைதானத்தில் நடைபெறவுள்ளது. இதற்கான ஏற்பாடுகளை இளையராஜா 75 விழாக்குழுவினர் செய்து வருகின்றனர். இந்த விழாவில் பங்கேற்பதற்காக முக்கிய பிரமுகர்களுக்கு அழைப்பிதழ் கொடுக்கப்பட்டு வருகிறது. இந்நிலையில் சென்னையை அடுத்த மறைமலைநகர் மகேந்திரா சிட்டியில் நடைபெற்று வரும் 5 -வது தமிழ்நாடு சர்வதேச பலூன் திருவிழாவில் இளையராஜா 75  என்று எழுதப்பட்ட பிரமாண்ட பலூன்கள் பறக்கவிடப்பட்டு, அதில் இளையராஜாவும், நடிகர் விஷாலும் தனித்தனி பலூன்களில் பறந்து நிகழ்ச்சிக்கான டிக்கெட் விற்பனையை தொடங்கி வைக்க இருக்கின்றனர். இதற்கான ஏற்பாடுகளை, தயாரிப்பாளர் சங்க நிர்வாகிகளும், விழாக்குழுவினரும் செய்து வருகின்றனர்.